ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଆଜି ଭୁବନେଶ୍ୱରରେ ‘ସୁଭଦ୍ରା’ର ଶୁଭାରମ୍ଭ କରିଛନ୍ତି । ଏହା ବିଜେପି ପାଇଁ ଏକ ବଡ଼ ଭୋଟ ବ୍ୟାଙ୍କ ସୃଷ୍ଟି କରିବ ଏଥିରେ ତିଳେ ମାତ୍ର ସନ୍ଦେହ ନାହିଁ । ନବୀନ ଯେପରି ଏକ ଟଙ୍କିଆ ଚାଉଳ ପାଇଁ ନିର୍ବାଚନ ଜିତୁଥିଲେ ସେପରି ବିଜେପି ସୁଭଦ୍ରା ପାଇଁ ଆଗାମୀ ପଂଚାୟତ ନିର୍ବାଚନର ଅଧିକ ଭୋଟ ପାଇବ କୁହାଯାଇପାରେ । ରାଜ୍ୟର ମହିଳା ଏହାଦ୍ବାରା ପୁଣି ମୋଦିଙ୍କୁ ଭୋଟ ଦେବାକୁ ଆଗ୍ରହ ପ୍ରକାଶ କରିବେ । ଏହି ଯୋଜନା ନିଶ୍ଚୟ ମହିଳାଙ୍କୁ ବଳ ଦେବ, ସଶକ୍ତିକରଣ ହେବାରେ ସହଯୋଗ କରିବ । ବିଶେଷ କରି ଗ୍ରାମା ୧ କୋଟିରୁ ଅଧିକ ମହିଳା ବିଜେପିକୁ ଆଗାମୀ ଦିନରେ ଆଶୀର୍ବାଦ କରିବେ । ତେଣୁ ବିଜେପି ପାଇଁ ଏହା ଏକ ବଡ଼ ମାଇଲେଜ ଦେବ । ଆଜି ପ୍ରଧାନମନ୍ତ୍ରୀ ୧୦ ଲକ୍ଷରୁ ଅଧିକ ମହିଳାଙ୍କ ବ୍ୟାଙ୍କ ଆକାଉଣ୍ଟକୁ ପାଣ୍ଠି ହସ୍ତାନ୍ତରର ଶୁଭାରମ୍ଭ କରିଛନ୍ତି । ତାଙ୍କ ଭାଷଣ ଓଡ଼ିଶାର ମହିଳାମାନଙ୍କ ଉଦ୍ଦେଶ୍ୟରେ ଥିଲା । ତେଣୁ ଆଗାମୀ ଦିନରେ ରାଜ୍ୟର ମହିଳା ଭୋଟ ବିଜେପି ଆଡ଼କୁ ଯିବ । ଯାହା ଦ୍ବାରା ବିଜେଡିର ଅଧିକ କ୍ଷତି ହେବ । ସେହିପରି ଶ୍ରୀ ମୋଦୀ ୨୮୦୦ କୋଟିରୁ ଅଧିକ ଟଙ୍କାର ରେଳ ପ୍ରକଳ୍ପ ପାଇଁ ଶିଳାନ୍ୟାସ କରିଛନ୍ତି । ଏହା ଫଳରେ ରାଜ୍ୟର ରେଳ ବିକାଶ ଦିଗରେ ଗତି କରିବ । ୧୦୦୦ କୋଟିରୁ ଅଧିକ ଟଙ୍କାର ଜାତୀୟ ରାଜପଥ ପ୍ରକଳ୍ପର ଶିଳାନ୍ୟାସ ମଧ୍ୟ ରାଜ୍ୟ ପାଇଁ ନିଯୁକ୍ତି ସହ ଗମନାଗମନରେ ଉନ୍ନତି ଆଣିବ ।
ପ୍ରଧାନମନ୍ତ୍ରୀ ପାଖାପାଖି ୧୪ଟି ରାଜ୍ୟର ପ୍ରଧାନମନ୍ତ୍ରୀ ଗ୍ରାମୀଣ ଆବାସ ଯୋଜନା ଅଧୀନରେ ପ୍ରାୟ ୧୦ ଲକ୍ଷ ହିତାଧିକାରୀଙ୍କୁ ଗୃହ ନିର୍ମାଣ ସହାୟତାର ପ୍ରଥମ କିସ୍ତି ଜାରି କରିଥିଲେ। ଏଥିରେ ଓଡ଼ିଶାକୁ ମଧ୍ୟ ସିଂହ ଭାଗ ମିଳିଛି । ୨୬ ଲକ୍ଷ ହିତାଧିକାରୀଙ୍କ ପାଇଁ ଗୃହ ପ୍ରବେଶ ଉତ୍ସବରେ ଓଡ଼ିଶାର ମଧ୍ୟ ଭାଗ ରହିଛି । ତେଣୁ ଏହି ସବୁ ପ୍ରକଳ୍ପରେ ଓଡ଼ିଶା ଲାଭବାନ ହେବ ।
ଦିନ ଥିଲା ଓଡ଼ିଶାକୁ ରେଳ ବିକାଶ ପାଇଁ ଟଙ୍କା ମିଳୁନଥିଲା ଆଜି ଓଡିଶା ପାଇଁ 2871 କୋଟି ମୂଲ୍ୟର ବହୁ ଗୁରୁତ୍ୱପୂର୍ଣ୍ଣ ରେଳ ପ୍ରକଳ୍ପର ଭିତ୍ତିପ୍ରସ୍ତର ଉତ୍ସର୍ଗୀକୃତ କରିଛନ୍ତି ମୋଦି । ଏହି ରେଳ ଭିତ୍ତିଭୂମି ପ୍ରକଳ୍ପଗୁଡ଼ିକ ସଂଯୋଗକୁ ଦୃଢ଼ୀଭୁତ କରାଇବ । ଓଡିଶାର ଶିଳ୍ପ, ସମ୍ବଳ ସମୃଦ୍ଧ ଏବଂ ଆଦିବାସୀ ପ୍ରାଧାନ୍ୟ ଅଞ୍ଚଳରେ ରେଳ ନେଟୱର୍କକୁ ମଜବୁତ କରିବ ।
- ବିଜୟନଗରାମ-ଟିଟିଲାଗଡ ତୃତୀୟ ଲାଇନ ପ୍ରକଳ୍ପ, କୋରାପୁଟ-ସିଙ୍ଗାପୁର ରୋଡ୍ ଦୋହରୀକରଣ ପ୍ରକଳ୍ପ, ବୁଢାପଙ୍କ-ଶାଳଗାଁ ତୃତୀୟ ଏବଂ ଚତୁର୍ଥ ଲାଇନ ପ୍ରକଳ୍ପ, ବଣ୍ଡାମୁଣ୍ଡା-ରାଞ୍ଚି ଦୋହରୀକରଣ ପ୍ରକଳ୍ପର ଉତ୍ସର୍ଗ ଓଡିଶାର ରେଳ ଭିତ୍ତିଭୂମି ବିକାଶ ପାଇଁ ଗୁରୁତ୍ୱପୂର୍ଣ୍ଣ । ସିଜୁ-ପାରାଦୀପ ଫ୍ଲାଏଓଭର ,ପାରାଦୀପ-ବଡ଼ବନ୍ଧ ତୃତୀୟ ଏବଂ ଚତୁର୍ଥ ଲାଇନ ଉଭୟ ମାଲ ପରିବହନ ଏବଂ ଯାତ୍ରୀ ଯାତାୟାତ ପାଇଁ କ୍ଷମତା ବୃଦ୍ଧି କରିବା ସହିତ ପାରାଦୀପ ବନ୍ଦର ସହିତ ସଂଯୋଗ ବୃଦ୍ଧି କରିବ । ଏହା ହିଁ କୁହାଯାଇପାରେ ଯେ ଏହି ପ୍ରକଳ୍ପଗୁଡ଼ିକ ଓଡିଶାର ରେଳ ନେଟୱର୍କକୁ ମଜବୁତ କରିବ । ଯାତାୟାତ ସୁବିଧା, ଶିଳ୍ପ ସୃଷ୍ଟି କରିବାରେ ସାହାଯ୍ୟ କରିବ । ଓଡ଼ିଶା ଦେଶର ଦ୍ରୁତ ଅର୍ଥନୈତିକ ଅଭିବୃଦ୍ଧି ରାଜ୍ୟରେ ଆଗାମୀ ଦିନରେ ପରିଣତ ହେବ ।
ନରେନ୍ଦ୍ର ଦାଶ
