କାଲି ଖୋଲିବ ରତ୍ନଭଣ୍ଡାର, ସକାଳ ୮ଟାରୁ ସାଧାରଣ ଦର୍ଶନ ବନ୍ଦ

ପୁରୀ: ଆସନ୍ତାକାଲି ପୁଣି ଖୋଲାଯିବ ରତ୍ନଭଣ୍ଡାର। ତେଣୁ ସକାଳ ୮ଟାରୁ ଶ୍ରୀମନ୍ଦିରରେ ସାଧାରଣ ଦର୍ଶନ ବନ୍ଦ ରହିବ। ଚାରି ଦ୍ଵାର ବନ୍ଦ ରହିବ। କେବଳ ସିଂହଦ୍ଵାର ଦେଇ ଅଧିକୃତ ବ୍ୟକ୍ତି ଓ ସେବାୟତ ଯିବା ଆସିବା କରି ପାରିବେ। ରତ୍ନଭଣ୍ଡାର ଖୋଲିବା ଥିବାରୁ ଶ୍ରୀମନ୍ଦିର ପ୍ରଶାସନ ପକ୍ଷରୁ ନିଷ୍ପତ୍ତି ନିଆଯାଇଛି। ଏ ନେଇ ବୁଧବାର ଶ୍ରୀମନ୍ଦିର ମୁଖ୍ୟ ପ୍ରଶାସକ ଅରବିନ୍ଦ ପାଢୀ ସୂଚନା ଦେଇଛନ୍ତି।

ଶ୍ରୀମନ୍ଦିର ମୁଖ୍ୟ ପ୍ରଶାସକ କହିଛନ୍ତି, ରତ୍ନଭଣ୍ଡାର ଖୋଲା ଯାଉଥିବାରୁ ଗୁରୁବାର ଦିନ ଭକ୍ତମାନଙ୍କ ପାଇଁ ମନ୍ଦିରର ପ୍ରବେଶ କଟକଣା ରହିବ। ସକାଳ ୯ଟା ପରେ କମିଟିର ସଦସ୍ୟ ଶ୍ରୀମନ୍ଦିରକୁ ପ୍ରବେଶ କରିବେ । ପ୍ରାୟ ସକାଳ ୮ଟାରୁ ସାଧାରଣ ଭକ୍ତଙ୍କ ପାଇଁ ମନ୍ଦିରରେ ପ୍ରବେଶ କଟକଣା କରାଯିବ । ଜଷ୍ଟିସ ରଥ ପୂର୍ବରୁ କହି ସାରିଛନ୍ତି ଯେ, ଗୁରୁବାର ଶୁଭ ସମୟ ସକାଳ ୯ଟା ୫୧ ମିନିଟରୁ ୧୨ଟା ୧୫ ମଧ୍ୟରେ ରତ୍ନଭଣ୍ଡାର ପୁଣି ଖୋଲାଯିବ ।

ରଥାରୁଢ଼ ଶ୍ରୀବିଗ୍ରହଙ୍କର ସୁନାବେଶ ବା ବଡତଢାଉ ବେଶ

ଭିତର ଭଣ୍ଡାରର ତାଲା ଖୋଲା ଯାଇ ଅଳଙ୍କାର ସ୍ଥାନାନ୍ତରଣ ହେବ । ସିନ୍ଦୁକ ଏବଂ ଆଲମାରୀରେ ଥିବା ଅଳଙ୍କାର ସବୁ ଅସ୍ଥାୟୀ ରତ୍ନଭଣ୍ଡାରର ଖଟଶେଜ ଘରକୁ ସ୍ଥାନାନ୍ତର କରାଯିବ । ସମସ୍ତ ସ୍ଥାନାନ୍ତରଣ ପ୍ରକ୍ରିୟାର ଭିଡିଓଗ୍ରାଫି କରାଯିବ । ସ୍ଥାନାନ୍ତରଣ ସରିଲେ ରତ୍ନଭଣ୍ଡାରର ତାଲା ସିଲ୍ କରାଯିବ । ତାଲାକୁ ଜଉମୁଦ ସିଲ୍ କରାଯାଇ ଚାବି ଟ୍ରେଜେରୀରେ ରଖାଯିବ ।

ସୂଚନାଯୋଗ୍ୟ, ଦୀର୍ଘ ୪୬ ବର୍ଷର ପ୍ରତୀକ୍ଷା ପରେ ଜୁଲାଇ ୧୪ ତାରିଖରେ ନିର୍ଦ୍ଧାରିତ ଶୁଭ ମୁହୂର୍ତ୍ତ ୧ଟା ୨୮ ମିନିଟ୍ରେ ରତ୍ନଭଣ୍ଡାର ଖୋଲା ଯାଇଥିଲା।ଭିତରକୁ ଜଷ୍ଟିସ ବିଶ୍ଵନାଥ ରଥଙ୍କ ନେତୃତ୍ଵାଧିନ ୧୨ ଜଣିଆ କମିଟି ପ୍ରବେଶ କରିଥିଲେ। ବାହାର ରତ୍ନଭଣ୍ଡାର ଖୋଲା ଯାଇ ସୁନା ଅଳଙ୍କାର ଅସ୍ଥାୟୀ ଷ୍ଟ୍ରଙ୍ଗ ରୁମକୁ ସ୍ଥାନାନ୍ତର କରାଯାଇଥିଲା। ଏହା ପରେ ସିଲ୍ ମରାଯାଇଥିଲା। କିନ୍ତୁ ଟ୍ରେଜେରିରୁ ଆସିଥିବା ଚାବିରେ ଭିତର ଭଣ୍ଡାର ଖୋଲି ନ ଥିବାରୁ ତାଲା ଭଙ୍ଗା ଯାଇଥିଲା। କମିଟି ଭିତରକୁ ପ୍ରବେଶ କରିଥିଲେ ହେଁ ସମୟ ଅଭାବରୁ ଅଧିକ ସମୟ ନ ରହି କାର୍ଯ୍ୟ ସ୍ଥଗିତ ରଖିଥିଲେ।