୨୦୨୪ରେ ନେତା ନୁହଁ ବିଜେଡି ପାଇଁ ମୁଣ୍ଡ ବିନ୍ଧା ପାଲଟିବେ କର୍ମୀ ! ସୃଷ୍ଟି ହେବେ ରାଜୁ ଦାସ
ଭୁବନେଶ୍ୱର: ଓଡ଼ିଶାରେ ଲଗାତାର ୨୩ ବର୍ଷ ଧରି ବିଜେଡି ଶାସନ କ୍ଷମତାରେ ଥିବା ବେଳେ ୨୦୨୪ ନିର୍ବାଚନକୁ ଆଉ ମାତ୍ର ୧୦ ମାସ ବାକି ଅଛି । ନିର୍ବାଚନର ଠିକ୍ ପୂର୍ବରୁ ନବୀନ ମନ୍ତ୍ରିମଣ୍ଡଳରେ ଛୋଟ ପରିବର୍ତ୍ତନ ଆଣିଥିବା ବେଳେ ଏହା ଦଳ ପାଇଁ ବୁମେରାଂ ସାଜିଛି। ସୋମବାର ନବୀନଙ୍କ ମନ୍ତ୍ରିମଣ୍ଡଳରେ ବିକ୍ରମ କେଶରୀ ଆରୁଖ, ସୁଦାମ ମାରାଣ୍ଜି ଓ ସାରଦା ପ୍ରସାଦ ନାୟକ ସାମିଲ୍ ହୋଇଛନ୍ତି ।
ଦକ୍ଷିଣ, ଉତ୍ତର ଓ ପଶ୍ଚିମ ଓଡ଼ିଶାର ୩ ବରିଷ୍ଠ ନେତାଙ୍କୁ ନବୀନ ମନ୍ତ୍ରୀ ଭାବେ କ୍ୟାବିନେଟରେ ସାମିଲ୍ କରିଥିବା ବେଳେ ପଶ୍ଚିମ ଓଡ଼ିଶାରେ ବିଜେଡିର ବରିଷ୍ଠ ନେତା ସୁଶାନ୍ତ ସିଂଙ୍କ ସମର୍ଥକ ଅସନ୍ତୋଷ ଜାହିର୍ କରିଛନ୍ତି । ସମସ୍ତଙ୍କ ଆଶା ଥିଲା ସୁଶାନ୍ତଙ୍କୁ ନବୀନ ପଦ୍ମପୁର ପାଇଁ ପୁରସ୍କାର ଦେଇ ମନ୍ତ୍ରିମଣ୍ଡଳରେ ସାମିଲ୍ କରିବେ । ହେଲେ ସେମିତି କିଛି ହେଲାନି । ସୁଶାନ୍ତ ଭିତରେ ଭିତରେ କୁହୁଳୁ ଥିବା ବେଳେ ତାଙ୍କ ସମର୍ଥକଙ୍କ ଜରିଆରେ ବିଜେଡି ଶିବିରରେ ନିଆଁ ଲଗାଇଥିବା ଚର୍ଚ୍ଚା ହେଉଛି ।
ସୁଶାନ୍ତ ସିଂଙ୍କ ସପକ୍ଷରେ ବରଗଡ଼ରୁ ବଲାଙ୍ଗିର ଯାଏ ସ୍ୱର ଉଠଥିବା ବେଳେ ସେ କହିଛନ୍ତି, ଦଳର ସଭାପତି ତଥା ମୁଖ୍ୟମନ୍ତ୍ରୀ ଯାହା ନିଷ୍ପତ୍ତି ନେବେ ସେ ମାନିବେ । ନବୀନଙ୍କ ଆଶୀର୍ବାଦ ତାଙ୍କ ଉପରେ ରହିଥିବା କହିଛନ୍ତି ସୁଶାନ୍ତ ସିଂ । କିନ୍ତୁ ସମର୍ଥକ ସୁଶାନ୍ତ ସିଂଙ୍କୁ ମନ୍ତ୍ରୀ ପଦ ଦେବା ଲାଗି ଅଡ଼ି ବସିଛନ୍ତି । ରାଜନୈତିକ ସମୀକକ୍ଷଙ୍କ ମତରେ ବରଗଡ଼ରୁ ଏ ଅସନ୍ତୋଷ ଆରମ୍ଭ ମାତ୍ର । ଧାମନଗର ନିର୍ବାଚନ ବେଳେ ବିଜେଡି ରାଜୁ ଦାସଙ୍କୁ ଟିକେଟ୍ ନ ଦେଇ ଯେଉଁ ଭୁଲ୍ କରିଥିଲା, ସମାନ ଭୁଲ୍ ସୁଶାନ୍ତ ସିଂଙ୍କୁ ମନ୍ତ୍ରୀ ପଦ ନ ଦେଇ କରିଛି ।
ତେବେ ବରିଷ୍ଠ ବିଜେଡି ନେତା ଏନେଇ ଖୋଲାଖୋଲି କିଛି କହୁ ନଥିଲେ ମଧ୍ୟ ଭିତରେ ଭିତରେ ଦାନ୍ତ ରଗଡ଼ୁଛନ୍ତି । ସାଧାରଣ ନିର୍ବାଚନକୁ ଆଉ କେଇଟା ମାସ ବାକି ଥିବାରୁ ସମସ୍ତେ ଟିକେଟ୍ ଉପରେ ନଜର ରଖିଛନ୍ତି । ହେଲେ କାହାକୁ ଟିକେଟ୍ ମିଳିବ ଆଉ କାହାର କଟିବ ତାକୁ ନେଇ ସମସ୍ତେ ଦ୍ୱନ୍ଦ୍ୱରେ ଥିବା ବେଳେ ନିକଟରେ କିଛି ବିଜେଡି ବିଧାୟକ ନବୀନ ନିବାସରେ ନବୀନଙ୍କୁ ଭେଟିଥିଲେ । ନବୀନ ସମସ୍ତଙ୍କୁ ଟିକେଟ୍ ନେଇ ଆଶ୍ୱସନା ଦେଇଛନ୍ତି । ଯଦି ଦଳ ଟିକେଟ୍ ନ ଦିଏ ତେବେ ସେମାନେ ରାଜୁ ଦାସଙ୍କ ଭଳି ସ୍ୱାଧୀନ ପ୍ରାର୍ଥୀ ବିଜେଡିର ଭୋଟକୁ ଭାଙ୍ଗିବେ ବୋଲି ଆକଳନ କରାଯାଉଛି ।
ତେବେ ଦେଖିବାର କଥା ମନ୍ତ୍ରିମଣ୍ଡଳ ଅଦଳବଦଳ ପରେ ବରଗଡ଼ରୁ କୁହୁଳିବା ଆରମ୍ଭ ହୋଇଥିବା ଅସନ୍ତୋଷର ଧୂଆଁ ବାଚସ୍ପତି ଚୟନ ପରେ ଶାନ୍ତ ପଡ଼ୁଛି ନା ନିଆଁ ହୋଇ ଆଉ କେଉଁ ଜିଲ୍ଲାକୁ ବ୍ୟାପୁଛି ? ଏମିତିରେ ବିଜେଡିରେ ମନ୍ତ୍ରୀ କୁହନ୍ତୁ ଅବା ଅନ୍ୟ ପଦ ଲାଗି ଆଶାୟୀଙ୍କ ସଂଖ୍ୟା କିଛି କମ୍ ନୁହେଁ । ଏଭଳି ସ୍ଥିତିରେ ନବୀନ କାହାକୁ କିଭଳି ସନ୍ତୁଷ୍ଟ କରିବେ ତାହା ଉପରେ ସମସ୍ତଙ୍କ ନଜର ରହିଛି ।
