ଭୁବନେଶ୍ୱର: ସୌମ୍ୟରଞ୍ଜନଙ୍କ ’ସମ୍ବାଦ’ ବୁଝିଗଲା ସରକାରଙ୍କୁ ପ୍ରଶ୍ନ କଲେ ଅବସ୍ଥା କଣ ହେବ । ଯେଉଁଥିପାଇଁ ଅର୍ଥନୈତିକ ଅପରାଧ ଶାଖା (EOW)ର ରେଡ୍ ପରେ ସମ୍ବାଦ ଆଉ ସରକାରଙ୍କ ବିରୋଧରେ ପଦେ ବି ଲେଖୁନି । ଆମ ଘର ହାଲଚାଲରେ ସୌମ୍ୟ ସରକାରଙ୍କୁ ପ୍ରଶ୍ନ କରି ପାଣ୍ଡିଆନ୍ ଓ ନବୀନଙ୍କୁ ସମାଲୋଚନା କରୁଥିଲେ ତାହାବି ଆପାତତଃ ସବୁ ଦିନ ଲାଗି ବନ୍ଦ ହୋଇ ଯାଇଛି  ।

ସମ୍ବାଦରେ ରାଜ୍ୟ ସରକାରଙ୍କ ଇଓଡବ୍ଲୁର ୫ ଦିନିଆ ଛାନଭିନ୍ ପରେ ଶିଥିଳ ପଡ଼ିଛି ମାମଲା । ପୂର୍ବଭଳି ସରକାରଙ୍କ ମୁଖପାତ୍ର ସାଜିଥିବା ନନ୍ଦିଘୋଷ ଟିଭି ଓ ସକାଳ ବି ’ସମ୍ବାଦ’କୁ ନେଇ ଡେଉଁ ନାହାନ୍ତି । କୁହାଯାଉଛି ଏହା ପଛରେ ଦିଲ୍ଲୀରେ ବଡ଼ ଡିଲ୍ ହୋଇଛି । ଡିଲରେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ କୁଆଡ଼େ ମଧ୍ୟସ୍ଥି ସାଜିଥିବା ଚର୍ଚ୍ଚା ହେଉଛି ।

ସମର୍ଥିତ ବିଶ୍ୱସ୍ତ ସୂତ୍ରରୁ ଫ୍ଲାଶ ଓଡ଼ିଶାକୁ ମିଳିଥିବା ସୂଚନା ଅନୁସାରେ, ଗତ ସପ୍ତାହରେ ସମ୍ବାଦର ସମ୍ପାଦକ ତଥା ବିଜେଡିରୁ ବହିଷ୍କୃତ ଖଣ୍ଡପଡ଼ା ବିଧାୟକ ସୌମ୍ୟରଞ୍ଜନ ପଟ୍ଟନାୟକ ଦିଲ୍ଲୀରେ କେନ୍ଦ୍ର ସ୍ୱରାଷ୍ଟ୍ର ମନ୍ତ୍ରୀ ଅମିତ ଶାହଙ୍କୁ ଭେଟିଥିଲେ । ଆଉ ସେଠାରେ ହୋଇଥିବା ଆଲୋଚନା ଅନୁସାରେ, ’ସମ୍ବାଦ ଗ୍ରୁପ୍’ ପାଣ୍ଡିଆନ୍ କିମ୍ବା ନବୀନଙ୍କୁ ସମାଲୋଚନା କରିବ ନାହିଁ । ପ୍ରତି ବଦଳରେ ଇଓଡବ୍ଲୁରେ ସୌମ୍ୟଙ୍କ ’ସମ୍ବାଦ’ ବିରୋଧରେ ଆସିଥିବା କଥିତ ୩୦୦ କୋଟିର ବ୍ୟାଙ୍କ ଋଣ ଘୋଟାଲାର ତଦନ୍ତକୁ ଚପାଇ ଦିଆଯିବ ।

ଓଟିଭି, ବଡ଼ ଖବର ପରେ ଏବେ ‘ସମ୍ବାଦ ଗ୍ରୁପ୍’… ଆଗକୁ ଆଉ କାହା ପାଳି ?

ଆଉ ଚଳିତ ସପ୍ତାହରେ ମଧ୍ୟ ’ସମ୍ବାଦ’ରେ ଏହାର ପ୍ରତିଫଳନ ଦେଖିବାକୁ ମିଳିଛି । କନକ ନ୍ୟୁଜ୍ ବି ଆକ୍ରାମଣାତ୍ମକ ମୁଡରେ ନାହିଁ । କନକ ନ୍ୟୁଜର ସମ୍ପାଦକ ମନୋରଞ୍ଜନ ମିଶ୍ର ଏହାକୁ ନେଇ ବେଶ୍ ଖୁସିଥିବା କର୍ମଚାରୀ ମହଲରେ ଚର୍ଚ୍ଚା ହେଉଛି ।

କିନ୍ତୁ ଆ ବଳଦ ମୋତେ ବିନ୍ଧ ନ୍ୟାୟରେ ସୌମ୍ୟ ସିନା କାନ ମୁଣ୍ଡା ଆଉଁସୁ ଛନ୍ତି । କିନ୍ତୁ ଏସବୁକୁ ସହି ପାରୁ ନାହାନ୍ତି । ବିଜେଡିରୁ ବିଦା ହେବା ପରେ କେଉଁଠିକୁ ଯିବେ ? ନିଜ ଭବିଷ୍ୟତ ନା ସଂସ୍ଥା କଥା ଦେଖିବେ ? ନା ଝିଅର ରାଜନୈତିକ ଭବିଷ୍ୟତ ପାଇଁ କାହା ସହ ସାଲିସ୍ କରିବେ ସେ ନେଇ ପଟ୍ଟନାୟକ ପରିବାରରେ ଆଲୋଚନା ଚାଲିଛି ।

ଏହାରି ଭିତରେ ଗୁରୁବାର ଇଓଡବ୍ଲୁ ପକ୍ଷରୁ ’ସମ୍ବାଦ’ର କେତେକ ପୁରୁଣା କର୍ମଚାରୀଙ୍କୁ ଜେରା କରାଯାଇଛି । ଇଓଡବ୍ଲୁରେ ହାଜର ହୋଇ ଲୋନ୍ ସ୍କାମ୍ ମାମଲାରେ ପକ୍ଷ ରଖିଛନ୍ତି ବରିଷ୍ଠ ସାମ୍ବାଦିକ ତଥା ଓଡ଼ିଶା ରିପୋର୍ଟରର ସମ୍ପାଦକ ଦେବେନ୍ଦ୍ର ପୃଷ୍ଟି । ଆଗକୁ ଇଓଡବ୍ଲୁ ସମ୍ବାଦର କେତେକ ପୂର୍ବତନ କର୍ମଚାରୀ ଯେଉଁମାନେ ଏବେ ବିଜେଡିରେ ଅଛନ୍ତି, ସେମାନଙ୍କୁ ପଚରାଉଚରା ପାଇଁ ଡାକିବାକୁ ପ୍ରସ୍ତୁତ ହେଉଥିବା ଚର୍ଚ୍ଚା ହେଉଛି ।