ଓଟିଭି, ବଡ଼ ଖବର ପରେ ଏବେ ‘ସମ୍ବାଦ ଗ୍ରୁପ୍’… ଆଗକୁ ଆଉ କାହା ପାଳି ?
ଭୁବନେଶ୍ୱର: ସରକାରର ବୟସ ବଢ଼ିବା ସହ ହାବଭାବ ବଦଳି ଯାଇଛି । ବୟସାଧିକ ଯୋଗୁଁ ଖୋଦ୍ ନବୀନ ସବୁ ବୁଝି ପାରୁନଥିବା ବେଳେ ତାର ଫାଇଦା ଉଠା ଯାଉଥିବା ଚର୍ଚ୍ଚା ହେଉଛି । ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ କୁହାଯାଉଥିବା (CMO)ରେ ୧୫ ଜଣ ଅଧିକାରୀ ରହିଛନ୍ତି । ଅଥଚ ନବୀନ ସବୁକଥା ତାଙ୍କ ବ୍ୟକ୍ତିଗତ ସଚିବ ଭି.କେ ପାଣ୍ଡିଆନଙ୍କୁ ବୁଝିବା ଲାଗି ଦାୟିତ୍ୱ ଦେଇ ଦେଇଛନ୍ତି ।
ପାଣ୍ଡିଆନଙ୍କ ଭୂମିକାକୁ ନେଇ ବିରୋଧୀଙ୍କ ପ୍ରଶ୍ନ ପରେ ବିଭିନ୍ନ ସଭାରେ ମୁଖ୍ୟମନ୍ତ୍ରୀଙ୍କ ବ୍ୟକ୍ତିଗତ ସଚିବ ଏହାର ଉତ୍ତର ନବୀନଙ୍କ ରେକର୍ଡେଡ୍ ଅଡିଓ ଓ ଭିଡିଓ କଲ୍ ମାଧ୍ୟମରେ ଦେଇଛନ୍ତି । ଯାହା ଅସ୍ୱାଭାବିକ ଲାଗୁଥିବା ବେଳେ ଖଣ୍ଡପଡ଼ାର ବିଜେଡି ବିଧାୟକ ସୌମ୍ୟରଞ୍ଜନ ପଟ୍ଟନାୟକ ଏହାକୁ ନେଇ ସମ୍ବାଦର ସମ୍ପାଦକୀୟ ଲେଖି ସରକାରଙ୍କୁ ମୁଖ୍ୟମନ୍ତ୍ରୀଙ୍କ ବ୍ୟକ୍ତିଗତ ସଚିବଙ୍କ ବାବଦରେ ପ୍ରଶ୍ନ କରିଥିଲେ ।
ଆଉ ଏହା ପରେ ପରେ ହିଁ ବିଜେଡି ସୌମ୍ୟଙ୍କୁ ଦଳର ଉପସଭାପତି ପଦରୁ ବାହାର କରି ଦେଇଥିଲା । ଆଉ ଏବେ ସୌମ୍ୟଙ୍କ ସମ୍ବାଦ ଉପରେ ଆରମ୍ଭ ହୋଇଛି ଅର୍ଥନୈତିକ ଅପରାଧ ଶାଖାର ଚଢ଼ାଉ । ଅଭିଯୋଗ ସମ୍ବାଦ କୁଆଡ଼େ ସେମାନଙ୍କ କର୍ମଚାରୀଙ୍କ ନାଁରେ ଲକ୍ଷ ଲକ୍ଷ ଟଙ୍କାର ଋଣ ଉଠାଇଛି । ତେବେ କଥା ହେଉଛି ସମ୍ବାଦ ବର୍ଷେ କି ୨ ବର୍ଷର ସଂସ୍ଥା ନୁହେଁ । ପାଖାପାଖି ୪୦ ବର୍ଷ ଧରି ସମ୍ବାଦ ପ୍ରକାଶ ପାଇ ଆସୁଛି ।
ତେବେ ସମ୍ବାଦ ପ୍ରକାଶନର ୪୦ ବର୍ଷ ପରେ କାହିଁକି ଏଭଳି ଆସିଲା । ସମ୍ବାଦ ଯଦି ୧୦ରୁ ୧୫ ବର୍ଷ ତଳେ ଋଣ ନେଇଥିଲା ସଂସ୍ଥା ଛାଡ଼ିବାର ଦୀର୍ଘ ବର୍ଷେ ପରେ ପୂର୍ବତନ କର୍ମଚାରୀ କାହିଁକି ଅଭିଯୋଗ ଆଣିଲେ । ତାହା ପୁଣି ବିଜେଡି ସୌମ୍ୟଙ୍କୁ ଦଳର ଉପସଭାପତି ପଦରୁ କାଢ଼ୁ କାଢ଼ୁ । ଏଥିରୁ ସ୍ପଷ୍ଟ ଜଣାପଡ଼ୁଛି ଏହା ବିଜେଡି ଓ ନବୀନ ସରକାରଙ୍କ ଜାଣତରେ ଏବଂ ପ୍ରରୋଚନାରେ ହେଉଛି ।
ତେବେ ସରକାରଙ୍କୁ ସମାଲୋଚନା ପାଇଁ ଯେ କେବଳ ସମ୍ବାଦକୁ ଏଭଳି ପରିସ୍ଥିତିର ସାମ୍ନା କରିବାକୁ ପଡ଼ିଛି ତା ନୁହେଁ । ଏହା ପୂର୍ବରୁ ୨୦୨୦ ମସିହାରେ ଓଟିଭି ମଧ୍ୟ ସରକାରଙ୍କ ଆକ୍ରୋଶର ଶିକାର ହୋଇଥିଲା । ମୁଖ୍ୟମନ୍ତ୍ରୀ ନବୀନ ପଟ୍ଟାୟନକ କିଭଳି ମାତ୍ର ଅଧ ଘଣ୍ଟାରେ ୪ଟି ଜିଲ୍ଲାର ବନ୍ୟା ସ୍ଥିତି ପରଖିଲେ ସେନେଇ ଓଟିଭି ଖବର ଦେଖାଇଥିଲା ।
ଯାହା ପରେ ସରକାର ଓଟିଭି ଉପରେ ରେଡ୍ ଆରମ୍ଭ କରିଥିଲେ । ଏବେ ବିଜେପିର ରାଷ୍ଟ୍ରୀୟ ଉପସଭାପତି ଥିବା ବୈଜୟନ୍ତ ପଣ୍ଡା ପୂର୍ବରୁ ବିଜେଡିରେ ଥିଲେ । ବୈଜୟନ୍ତ ବିଜେଡିରେ ଥିବା ବେଳେ ଓଟିଭି ଅନେକ ଜମି କିଣିବା ସହ ଇଡକୋଠୁ ବି ଜମି ନେଇଥିଲା । ଅଥଚ ବିଜେଡିରୁ ବୈଜୟନ୍ତ ଯିବା ପରେ ଓଟିଭି ସରକାରଙ୍କୁ ସମାଲୋଚନା କରିବାରୁ ଆକ୍ରୋଶର ଶିକାର ହେବାକୁ ପଡ଼ିଥିଲା ।
ସେହିଭଳି ନବୀନଙ୍କ ଅଫିସିଆଲ୍ ରୋମ୍ ଗସ୍ତକୁ ନେଇ ୨୦୨୨ରେ ପ୍ରଶ୍ନ ପଚାରିଥିଲା ବଡ଼ ଖବର । ଯାହାକୁ ବି ସରକାର ସହଜରେ ଗ୍ରହଣ କରି ପାରି ନଥିଲେ । ବଡ଼ ଖବରର ସମ୍ପାଦକ ଅର୍ଦ୍ଧେନ୍ଦୁ ସାହୁଙ୍କୁ ବଡ଼ ଅପରାଧୀ ସଜାଇ ସରକାରଙ୍କ ଇଓଡବ୍ଲୁ ବାନ୍ଧି ନେଇଥିଲା । ଚ୍ୟାନେଲରେ ତାଲା ଝୁଲାଇ ଦେଇଥିଲେ ସରକାର ।
ଓଟିଭି, ବଡ଼ ଖବର ପରେ ଏବେ ସମ୍ବାଦ ଗ୍ରୁପ୍ ଉପରେ ସରକାର ସେଭଳି କାର୍ଯ୍ୟାନୁଷ୍ଠାନ ଗ୍ରହଣ କରୁଥିବା ନଜର ଆସୁଛନ୍ତି । ସରକାର ସଫା ସଫା କହିବା ସହ ପ୍ରମାଣିତ କରିଛନ୍ତି, ଯିଏ ବି ଅଙ୍ଗୁଳି ଉଠାଇବ ବ୍ୟବସ୍ଥା ତାକୁ ସ୍ଥାଣୁ କରି ଦେବ ।
