ଲୋକସଭା ସଦସ୍ୟତା ପଦ ହରାଇଲେ ରାହୁଲ ଗାନ୍ଧୀ
ନୂଆଦିଲ୍ଲୀ: କଂଗ୍ରେସ ନେତା ରାହୁଲ ଗାନ୍ଧିଙ୍କୁ ବଡ଼ ଝଟକା ଲାଗିଛି। ଲୋକସଭା ସଚିବାଳୟ ଶୁକ୍ରବାର ରାହୁଲଙ୍କ ସଂସଦ ସଦସ୍ୟତା ସମାପ୍ତ କରିଦେଇଛନ୍ତି। ଉଲ୍ଲେଖଯୋଗ୍ୟ ଯେ ସୁରଟ କୋର୍ଟ ମାନହାନୀ ମାମଲାରେ ଗୁରୁବାର ରାହୁଲଙ୍କୁ ଦୋଷୀ ସାବ୍ୟସ୍ତ କରିବା ସହ ୨ ବର୍ଷ ଜେଲଦଣ୍ଡାଦେଶ କରିଥିଲେ। ରାହୁଲ ଗାନ୍ଧି କେରଳ ୱାଇନାଡ ଲୋକସଭା ଆସନରୁ ସାଂସଦ ଥିଲେ।
ଏବେ ତାଙ୍କ ସଂସଦ ସଦସ୍ୟତା ସମାପ୍ତ ହୋଇଥିବାରୁ ଏହି ଆସନରେ ଉପନିର୍ବାଚନର ସମ୍ଭାବନା ସୃଷ୍ଟି ହୋଇଛି। ସୁରଟ ଜିଲ୍ଲା କୋର୍ଟଙ୍କ ରାୟ ପରେ ରାହୁଲଙ୍କ ସଂସଦ ସଦସ୍ୟତା ଉପରେ ଖଣ୍ଡା ଝୁଲିଥିଲା।
ଜନପ୍ରତିନିଧି ଆଇନ ଅନୁସାରେ ଯଦି ସାଂସଦ ଅଥବା ବିଧାୟକଙ୍କୁ କୌଣସି ମାମଲାରେ ୨ ବର୍ଷ ବା ତଦୁର୍ଦ୍ଧ୍ୱ ଦଣ୍ଡ ମିଳେ ଏଥିରେ ତାଙ୍କର ସଦସ୍ୟତା ( ସଂସଦ ଓ ବିଧାନସଭାରୁ) ରଦ୍ଦ ହୋଇଯାଇଥାଏ। କେବଳ ଏତିକି ନୁହେଁ ଦଣ୍ଡ ଅବଧି ପୂରଣ କରିବା ପରେ ୬ ବର୍ଷ ପର୍ଯ୍ୟନ୍ତ ନିର୍ବାଚନ ଲଢିବା ଲାଗି ଅଯୋଗ୍ୟ ମଧ୍ୟ ହୋଇଥାନ୍ତି।
ରାହୁଲ ଗାନ୍ଧି କର୍ଣ୍ଣାଟକର କୋଲାରରେ ୧୩ ଏପ୍ରିଲ ୨୦୧୯ରେ ଏକ ନିର୍ବାଚନ ସମାବେଶକୁ ସମ୍ବୋଧିତ କରି ‘ନିରବ ମୋଦି, ଲଳିତ ମୋଦି ଓ ନରେନ୍ଦ୍ର ମୋଦିଙ୍କ ସରନେମ କମନ କାହିଁକି? ସବୁ ଚୋରଙ୍କ ସାଙ୍ଗିଆ ମୋଦି କାହିଁକି?’ ବୋଲି ପ୍ରଶ୍ନ କରିଥିଲେ।
ରାହୁଲଙ୍କ ଏହି ବୟାନକୁ ନେଇ ବିଦେପି ବିଧାୟକ ତଥା ପୂର୍ବତନ ମନ୍ତ୍ରୀ ପୁର୍ଣ୍ଣେଶ ମୋଦି ତାଙ୍କ ବିରୋଧରେ ଭାରତୀୟ ଦଣ୍ଡବିଧି ଆଇନର ଧାରା ୪୯୯ ଓ ୫୦୦ରେ ଅପରାଧିକ ମାନହାନୀ ମୋକଦ୍ଦମା ରୁଜୁ କରିଥିଲେ। ବିଜେପି ବିଧାୟକ ଅଭିଯୋଗରେ ରାହୁଲ ୨୦୧୯ ନିର୍ବାଚନ ରାଲିକୁ ସମ୍ବୋଧିତ କରି ପୁରା ମୋଦି ସମୂଦାୟକୁ କଥିତ ରୂପେ ଏହା କହି ବଦନାମ କରିଥିଲେ ଯେ ସବୁ ଚୋରଙ୍କ ସାଙ୍ଗିଆ ମୋଦି କାହିଁକି ?
