ସୁରକ୍ଷା କର୍ମୀଙ୍କ ଏନକାଉଣ୍ଟରରେ ୧୨ ନକ୍ସଲ ନିହତ
ରାୟପୁର: ମହାରାଷ୍ଟ୍ର ସୀମା ଭଣ୍ଡୋଲୀ ଗାଁ ନିକଟରେ ବୁଧବାର ସୁରକ୍ଷାବଳଙ୍କ ସହ ସଂଘର୍ଷରେ ୧୨ ନକ୍ସଲ ପ୍ରାଣ ହରାଇଛନ୍ତି। ସେମାନଙ୍କ ନିକଟରୁ ବିପୁଳ ପରିମାଣରେ ଅସ୍ତ୍ରଶସ୍ତ୍ର ଜବତ ହୋଇଛି। ଜବତ ଅସ୍ତ୍ରଶସ୍ତ୍ରରେ ଏକେ-୪୭ ସମେତ ଅନେକ ଅଟୋମ୍ୟାଟିକ୍ ଅସ୍ତ୍ର ବି ଅଛି। ନକ୍ସଲଙ୍କ ସହ ସଂଘର୍ଷର ୨ ଜଣ ଜବାନ ଆହତ ହୋଇଛନ୍ତି। ଏହି ଏନକାଉଣ୍ଟର ଛତିଶଗଡ଼ର କାଙ୍କେର ଜିଲ୍ଲାକୁ ଲାଗି ରହିଥିବା ମହାରାଷ୍ଟ୍ରର ଗଡଚିରୌଲୀରେ ହୋଇଛି।
ବୁଧବାର ପୂର୍ବାହ୍ନ ୧୦ଟା ବେଳେ ଗଡ଼ଚିରୌଲୀରୁ ଏକ ଅପରେସନ ଲଞ୍ଚ କରାଯାଇଥିଲା। ଏଥିରେ ୭ସି-୬୦ ଟିମକୁ ଛତିଶଗଡ଼ ସୀମା ନିକଟବର୍ତ୍ତି ଭଣ୍ଡୋଲୀ ଗାଁରେ ମୁତୟନ କରାଯାଇଥିଲା। ସୂଚନା ମିଳିଥିଲା ଗାଁରେ ୧୨ରୁ ୧୫ ନକ୍ସଲ ଡେରା ପକାଇଛନ୍ତି। ମଧ୍ୟାହ୍ନରେ ନକ୍ସଲଙ୍କ ସହ ସୁରକ୍ଷାବଳଙ୍କ ଭୀଷଣ ଗୁଳି ବିନିମୟ ହୋଇଥିଲା। ପାଖାପାଖି ୬ ଘଣ୍ଟା ଧରି ଜାରି ଏହି ସଂଘର୍ଷ ରହି ରହି ଚାଲିଥିଲା। ଅଞ୍ଚଳରେ ଚଳାଯାଇଥିବା ତଲାସୀ ଅଭିଯାନରେ ଏପର୍ଯ୍ୟନ୍ତ ୧୨ ଜଣ ନକ୍ସଲଙ୍କ ଶବ ମିଳିଛି।
ସେମାନଙ୍କ ନିକଟରୁ ୩ଟି ଏକେ-୪୭, ୨ଟି ଇନସାସ୍, ଗୋଟିଏ କାର୍ବାଇନ, ଗୋଟିଏ ଏସଏଲଆର ସହିତ ୭ଟି ଅଟୋମେଟିକ ଅସ୍ତ୍ର ମିଳିଛି। ମୃତ ନକ୍ସଲଙ୍କ ମଧ୍ୟରୁ ଜଣକୁ ଟିପାଗଡ଼ ଦଲମ ପ୍ରଭାରୀ ଡିଭିସିଏମ ଲକ୍ଷ୍ମଣ ଓରଫ ଅତ୍ରାମ ଓରଫ ବିଶାଲ ଅତ୍ରାମ ଭାବେ ଚିହ୍ନଟ କରାଯାଇଛି। ଅଞ୍ଚଳରେ ନକ୍ସଲମାନଙ୍କ ଚିହ୍ନଟ ଓ ତଲାସ ଅଭିଯାନ ଜାରି ରହିଛି।
ସି-୬୦ର ଜଣେ ପିଏସଆଇ ଓ ଅନ୍ୟ ଜଣେ ଜବାନଙ୍କୁ ଗୁଳି ବାଜିବା ଯୋଗୁ ସେମାନେ ଆହତ ହୋଇଛନ୍ତି। ତେବେ ଦୁଇଜଣ ବିପଦ ମୁକ୍ତ ବୋଲି କୁହାଯାଇଛି। ମହାରାଷ୍ଟ୍ର ଗୃହମନ୍ତ୍ରୀ ଦେବେନ୍ଦ୍ର ଫଡନବୀଶ ଏହି ଅପରେସନ ପରେ ସି-୬୦ ଜବାନଙ୍କ ନିମନ୍ତେ ୫୧ ଲକ୍ଷ ଟଙ୍କାର ପୁରସ୍କାର ରାଶି ଘୋଷଣା କରିଛନ୍ତି।
